Sep 25, 2014

شعور ازلی کا راستہ


 

تحریر
 سیدہ سعیدہ خاتون عظیمی

فنا فی الشیخ وہ کیفیت ہے جہاں سے علم و آگہی اور شعور ازلی کا راستہ مل جاتا ہے۔ سالک جب روحانی راستے پر قدم رکھتا ہے تو اس کی حالت ایک بچے سی ہوتی ہے۔ جو چلنا تو جانتا ہے مگر اس کے باوجود بھی اسے رہنمائی کی اشد ضرورت ہوتی ہے۔ وہ ماں باپ کی انگلی پکڑے بغیر سڑک پر چل نہیں سکتا۔ نہ وہ تنہا سفر کرنے کے قابل ہوتا ہے۔ اس کی کمزوری اور محتاجی کا خیال کرتے ہوئے ماں باپ اپنے اوپر بچے کی نگہداشت کی ذمہ داریوں کو واجب کر لیتے ہیں اور ہر وقت اسے اپنی نظر میں رکھتے ہیں۔ روحانی استاد بھی اپنے مُرید کا روحانی باپ ہوتا ہے۔ وہ اپنی روحانی اولاد کی روحانی تربیت و تعلیم کو اپنے اوپر لازم کر لیتا ہے اور مُرید قریب ہو یا دُور ہر حال میں اسے اپنے روحانی تصرف کے دائرے میں رکھتا ہے۔ تاکہ لاتناہیت کے سفر پر روانہ ہونے والا یہ بے سروسامان مسافر راستے کی درگھٹاوں سے گھبرا کر حصول منزل کی طلب سے دل نہ چھوڑ بیٹھے۔ ایسے ہی ایک موقع پر مرشد کریم نے تحریر فرمایا تھا

’’خوشانصیب کہ روزانہ آپ کی تحریر نظر نواز ہوتی ہے۔ آپ ان دنوں جن حالات و کیفیات سے گزر رہی ہیں وہ ایک طرف جگر کو خون اور آنکھوں کو اشکبار کرنےکا راستہ ہے اور دوسری طرف یہی راستہ علم و آگہی اور شعور ازلی کا راستہ ہے۔ آپ خوب سمجھ لیجئے کہ یہ فقیر آپ کی کیفیت سے واقف ہے۔ جب آپ کے دل کا ایک تار ہلتا ہے تو میرے دل میں موجود ساڑھے گیارہ ہزار تار جھنجھنا اُٹھتے ہیں۔ آپ کی آنکھ سے جب آنسو کا ایک قطرہ بہتا ہے تو میرے اندر موجود سمندر میں طوفان آجاتا ہے۔

آپ جہاں ہیں ، جوبھی ہیں، جس طرح بھی ہیں۔ بہر حال ایک نقطہ ہیں۔ ایسا نقطہ جس نقطے کے ساتھ بے شمار کہکشانی نظام بندھے ہوئے ہیں۔ خوش ہو جائیے کہ اب کٹھن راستہ آپ نے عبور کر لیا ہے ۔ راستہ عبور کرنے کے بعد آگے کیا ہے یہ بات لکھنے سے زیادہ دیکھنے سے تعلق رکھتی ہےـ‘‘

حضرت الشیخ فرماتے ہیں کہ روحانی علوم کے سیکھنے کے لئے ایک استاد کا ہونا ضروری ہے تاکہ مرید کی روحانی کیفیات کے مطابق اس کی تربیت کر سکے۔ چونکہ روحانی علوم دُنیاوی عقل و شعور کے دائرے میں سیکھے جاتے ہیں اس لئے دُنیاوی عقل کا مطمئن ہونا بھی ضروری ہے۔ تاکہ مادی روشنیاں نُور کے رنگوں سے رنگین ہو جائیں اور نافرمانی کا ذہن ہمیشہ کے لئے فرمانبرداری کے مضبوط خول میں بند ہو جائے اور اللہ تعالیٰ کا بندہ بندگی کے فرش پر سربسجود ہو۔ روحانی تربیت کے اس اصول کو مدنظر رکھتے ہوئے مرشد اپنے مُرید کی تربیت اس کے ذہنی لیول اور روحانی سکت کے مطابق کرتا ہے۔

روحانی راستے میں سالک کے لئے سب سے کٹھن مرحلہ ’فنا فی الشیخ‘ کا درجہ ہے۔ اس درجہ کی کیفیات بھی مرید کی روحانی سکت کے مطابق درجہ بدرجہ ہوتی ہے۔ روحانی سکت روشنیوں کے جذب کرنے کی مقداروں سے بنتی ہے۔ جس کا شعور لاشعور کی روشنیوں کو جس حد تک جذب کرتا ہے روحانی سکت اسی حد تک تعبیر کی جاتی ہے۔ لاشعور کی روشنیاں شعور میں جذب ہو کر حواس کی رینج کو بڑھاتی ہیں۔ سالک کی نظر عالم ناسوت سے گزر کر لاشعور کی حدود میں مشاہدہ کرتی ہے۔ شعور میں جذب شدہ انرجی یا لاشعور کی روشنی غیب میں لا محدودیت کی حدود کا تعین کرتی ہے۔

لامحدودیت کی کوئی حد نہیں ہے۔ سالک کا شعور جس حد تک لاشعور کی روشنیوں کو جذب کرتا ہے وہی اس کی لامحدودیت بن جاتی ہے۔  عالم مثال کے پردے سے گزر کر علم کائنات کے انوار میں کائناتی خاکے اُبھرنے لگتے ہیں جو روح کا لطیفہ سری کا مقام ہے۔ اس مقام پر نوری خاکے روح کی نظر سے دیکھے جا سکتے ہیں۔ لطیفہ سری اور لطیفہ روحی ، روح انسانی کا دائرہ ہے۔ مرشد اپنی توجہ سے مرید کے لطائف کو متحرک کرتا ہے۔ تا کہ اس مقام پر رونما ہونے والی حرکات کا مشاہدہ کر سکے۔

اللہ تعالیٰ فرماتے ہیں کہ آسمانوں  اور زمینوں کی ہر شے اللہ کے نُور کا مظاہرہ ہے۔ جب مرشد کی توجہ مرید کے نقطہ ذات پر ہوتی ہے ۔ نقطہ ذات تجلی کا نقطہ ہے جو انا کا مقام ہے۔ تجلی کے نقطے میں کائنات کا ہر فرد انا کی صورت میں موجود ہے ۔ یعنی نُور کے ایک نقطے کی صورت ہے۔ جب مرشد کی توجہ مرید کے نقطے میں کام کرتی ہے۔ تو وہ اس نقطہ میں اپنی انا کے نقطے سے رابطہ قائم کر لیتا ہے۔ مرشد کی انا کی لہریں مرید کے نقطہ ذات کے اندر اپنا عکس آئینے کی طرح منعکس کرتی ہیں۔ اور مرید کی روح کی نگاہ نقطہ ذات میں مرشد کی انا کا عکس دیکھ لیتی ہے جو عالم مثال کا نوری خاکہ ہے۔ روح کی روشنی ہی کشش ہے اور عالم مثال کے اس نُوری خاکے   یعنی سری کی روشنیوں میں گریز کی حرکت ہے۔ کشش اور گریز کی حرکات اس نوری خاکے کو متحرک کر دیتی ہیں۔ اور روح کی نظر اس نوری خاکے کو دُنیا میں دیکھ لیتی ہے۔ مقام انا پر سالک اللہ نور السموات والارض کا مشاہدہ کر لیتا ہے۔ اللہ تعالیٰ فرماتے ہیں کہ کائنات میں میرے سوا اور کوئی نہیں ہے ۔ کل ذات کی انا خالق کی انا ہے اس دائرے میں مخلوق کی تمام انائیں جُزوی طور پر موجود ہیں اور اللہ تعالیٰ کی انا سے فیڈ ہو رہی ہیں۔ یہ جزوی انائیں نورکےوہ نقطے ہیں جو اللہ تعالیٰ کے کُن کہنے سے روح کی صورتوں میں جلوہ گر ہو جاتے ہیں۔ اللہ تعالیٰ آسمانوں اور زمینوں کا نُور ہے سے مراد نور کے یہی نقطے ہیں جو کائنات کی انائیں ہیں اور مخلوق کی کنہ حقیقت ہے۔

مرشد کے نقطہ ذات کی روشنی جب مرید کے نقطہ ذات  سے ٹکراتی ہے تو روشنیوں کی تخلیقی فطرت کے مطابق مرشد کی روشنیاں انا کی صورت اختیار کر لیتی ہیں اور مرشد کا یہ نوری عکس مرید کے نقطہ ذات کے آئینے میں نقش ہو جاتا ہے۔ تخلیق کا قانون ہے کہ جب ایک نقطہ ذات کی روشنی دوسرے نقطہ ذات کی روشنی سے اس طرح ملتی ہے کہ دونوں نقطہ ذات کی اناوں کا باہم ملاپ ہوتا ہے تو انا کی روشنیاں اپنے آپ کو انا کی صورت میں ظاہر کر دیتی ہیں اور انا کی یہ صورت روح کہلاتی ہے۔ دو اناوں کا باہمی ملاپ شعور ازلی کی بُنیاد  بنتا ہے۔ شعور ازلی تجلی ذات کا شعور ہے ۔ مقام انا عالم ناسوت ہے، جو تجلی ذات کا عالم ہے ۔ عالم لاہوت میں تجلی ذات کے گھیراو میں جب کائنات کی دو انائیں باہم ملتی ہیں تو انا کے اس نقطے سے لاشمار کائناتی نظام نور کے تاروں کے ساتھ بندھے دکھائی دیتے ہیں۔ تجلی کا یہ نقطہ صفت ربوبیت کے ساتھ ان کائناتی نظاموں کو اپنی روشنیوں سے فیڈ کرتا ہے۔ فنا فی  الشیخ کے درجے میں سالک کی عقل اپنی سکت کے مطابق ان علوم کو معانی پہناتی ہے۔ مگر اس حقیقت سے سب ہی واقف ہو جاتے ہیں کہ بغیر اس مقام سے گزرے ہوئے حقیقت تک رسائی ممکن نہیں ہے۔ اس مقام پر مرید کی مرکزیت مرشد کی ذات ہوتی ہے۔ بالکل اسی طرح جس طرح ایک بچے کی ساری مرکزیت اپنی ماں پر ہوتی ہے کہ ذرا آنکھ اوجھل ہوئی تو بچہ رو رو کر ہلکان ہو جاتا ہے۔ اور اپنی تمام ضروریات و تقاضوں کا ذمہ دار بھی ماں کو ہی سمجھتا ہے۔ اس کے لئے ماں ہی پوری کائنات ہے ۔ یہی کیفیت عشق فنا فی الشیخ کا درجہ ہے۔ جس میں شیخ  کی جدائی مرید پر بار گراں بن جاتی ہے۔ مرید کے نقطہ ذات کی روشنیاں شیخ  کی  روشنیوں میں اس طرح گم ہو جاتی ہیں کہ اسے اپنے آئینے میں صرف شیخ کا چہرہ دکھائی دیتا ہے۔ اس تحریر میں شیخ فرماتے ہیں کہ یہی وہ مقام ہے جس سے علم و آگاہی اور شعور ازلی کا راستہ ملتا ہے۔ اگر سالک اسی مقام پر اپنی انا کی تسکین کا سامان کر لے تو وہ اس سے آگے قدم نہیں اٹھا سکتا۔ شعور و عقل جو اس جسم کے اندر کام کر رہی ہے وہ ہر شے کو ایک صورت میں دیکھنا چاہتی ہے۔ پس جب سالک اس مقام پر شیخ کے نوری خاکے کو دیکھ لیتا ہے تو اسکی وہ انا جو نور کی تلاش میں روحانیت کے راستے پر چل رہی ہے اسے تسکین مل جاتی ہے اگر سالک اسی پر اکتفا کر ے تو وہ انہی نظاروں میں اپنے آپ کو گم کر دیتا ہے ۔ اور حقیقت نور کو جاننے کی سکت اس کے اندر پیدا نہیں ہوتی ۔ اسی لئے روحانیت میں اس مقام کو کٹھن کہا گیاہے کیونکہ اللہ تعالیٰ ہر صورت سے پاک ہے ۔ یہ مقام اس حقیقت تک پہنچنے کا راستہ ہے خود حقیقت نہیں ہے۔ حقیقت وہی ہے جو مرشد کریم نے فرمائی ہے کہ

آپ جہاں ہیں، جو بھی ہیں، جس طرح بھی ہیں، بہرحال ایک نُقطہ ہیں۔ ایسا نقطہ کہ جس کے ساتھ بے شمار کہکشانی نظام بندھے ہوئے ہیں۔

جب سالک اپنے نقطہ ذات کا مشاہدہ کر لیتا ہے یعنی وہ اپنی ذات کو تجلی کے ایک نقطے کی صورت دیکھ لیتا ہےاور اس تجلی کے اندر اسمائے الہٰیہ کے ساڑھے گیارہ ہزار رنگوں کا مشاہدہ کر لیتا ہے تو اپنے اندر موجود اسمائے الہٰیہ کی صفات کو بطور اپنی صلاحیت کے اپنے ارادے سے استعمال کر تا ہے۔ دوسرے لفظوں میں یک ذات کی انا کُل ذات  میں گُم ہو جاتی ہے۔ اس طرح سورج کی روشنی میں چاند ستارے گم ہو جاتے ہیں۔

سورج کی روشنی اپنی چادر میں چھُپا کر ان چاند ستاروں کو اپنی روشنی سے زندہ رکھتی ہے۔ جب ارادہ انہیں ظاہر کرنے کا ہوتا ہے تو سورج ان کے اوپر سے اپنی چادر ہٹا دیتا ہے۔ چاند ستارے فلک پر اپنی محفلیں سجا لیتے ہیں ۔ دنیا کی لاشمار آنکھیں انہیں دیکھ لیتی ہیں اور جب سورج چاہتا ہے کہ کوئی انہیں نہ دیکھے تو پھر انہیں اپنی قُبا میں چھپا لیتا ہے۔ مگر ہر دو حال میں سورج کی نگاہیں چاند ستاروں کو دیکھتی رہتی ہیں۔

Sep 23, 2014

عرس مبارک - عشق دا وارث - وارث شاہ ؒ

 
وارث شاہؒ برصغیر کی وہ ہستی ہیں جن کا نام کسی تعارف کا محتاج نہیں۔ وارث شاہؒ مشہور زمانہ تصنیف ”ہیر“ کے خالق اور پنجابی زبان کے عظیم صوفی شاعر ہیں۔ وارث شاہؒ پنجاب کی دھرتی کے ایک تاریخی قصبہ جنڈیالہ شیر خان جوکہ شیخوپورہ سے 14 کلومیٹر کے فاصلے پر واقع ہے میں پیدا ہوئے۔ انکے سن پیدائش کے متعلق حتمی طور پر کچھ نہیں کہا جا سکتا بعض کتابوں میں آپکا سن پیدائش 1150ھ بتایا جاتا ہے۔ آپکے والد کا نام سید گل شیر شاہ تھا۔ ابھی کمسن ہی تھے کہ علم حاصل کرنے کی غرض سے قصور کی جانب روانہ ہوئے اور حضرت مولانا غلام مرتضٰی جوکہ اسوقت قصور میں ہی تشریف فرما تھے کی خدمت اقدس میں حاضر ہوئے۔ خود ہی فرماتے ہیں
وارث شاہ وسنیک جنڈیالڑے دا
تے شاگرد مخدوم قصور دا اے

آپ نے بابا بُلھے شاہؒ کے ہمراہ اُن سے تعلیم حاصل کی۔ دنیاوی علم حاصل کر چکے تو مولوی صاحب نے اجازت دی کہ جا
ﺅ اب باطنی علم حاصل کرو اور جہاں چاہو بیعت کرو۔ تاریخ سے پتہ چلتا ہے کہ
بابا بلھے شاہؒ نے تو حضرت عنایت قادریؒ کی بیعت کی جبکہ سید وارث شاہ ؒنے حضرت خواجہ فریدالدین گنج شکرؒ کے خاندان میں بیعت کی
مودود دا لاڈلا پیر چشتی گنج شکر مسعود بھرپور ہے جی
خاندان وچ چشت دے کاملیت شہر فقر دا پٹن معمورہے جی

کچھ عرصہ پاکپتن شریف میں قیام کیا اور مراتب فقر طے کئے، واپسی پر جاہدکے ٹھٹھے میں جو پاکپتن شریف کے راستہ میں کچھ فاصلہ پر ایک چھوٹا سا گا
ﺅں ہے رات بسر کی۔ کہتے ہیں کہ صبح جب روانہ ہونے لگے تو ایک خوبصورت عورت جس کا نام کتابوں میں بھاگ بھری لکھا گیا ہے کو جاتے دیکھا اور اس پہ فریفتہ ہو گئے اور واپسی کا ارادہ ملتوی کر کے وہیں گاﺅں کے قریب ٹیلے پر واقع ایک چھوٹی سی مسجد میں رہائش اختیار کر لی۔ گاﺅں کے باسیوں نے بسبب عالم و فاضل اور فقیر ہونے کے ناطے انکی خدمت اور تعظیم شروع کر دی۔ ان ہی دنوں میں آپ نے مشہور قصہ ”ہیر رانجھا“ کی تخلیق کا کام شروع کیا جوکہ وہیں پر اختتام پذیر ہوا جبکہ کچھ لوگوں کا خیال ہے کہ آپ نے ہیر رانجھا کے قصہ کو آخری شکل اپنے آبائی گاﺅں جنڈیالہ شیر خان میں دی جس کو مختلف کاغذوں پر الٹی سیدھی لکیروں میں ڈھالا جس کا نمونہ اب بھی موجود ہے۔
جب ”ہیر رانجھا“ کے قصہ کے متعلق آپکے استاد محترم حضرت غلام مرتضٰی کو علم ہوا تو انہوں نے اس واقعہ پر ناراضگی کا اظہار کیا اور کہا وارث شاہؒ، بابا بلھے شاہ ؒنے علم حاصل کرنے کے بعد سارنگی بجائی اور تم نے ہیر لکھ ڈالی۔ آپ نے کوئی جواب نہ دیا تو مولانا نے اپنے مریدوں کو کہہ کر آپ کو ایک حجرے میں بند کروا دیا۔ دوسرے دن آپکو باہر نکلوایا اور کتاب پڑھنے کا حکم دیا جب آپ نے پڑھنا شروع کیا تو مولانا صاحب کی حالت دیکھنے کے قابل تھی۔ سننے کے بعد فرمایا، وارثا! تم نے تو تمام جواہرات مونج کی رسی میں پرو دئیے ہیں۔ یہ پہلا فقرہ ہے جو اس کتاب کی قدر و منزلت کو ظاہر کرتا ہے۔ سید وارث شاہ ؒدرحقیقت ایک درویش صوفی شاعر ہیں۔ ایک جگہ پر اللہ تعالیٰ کی حمد اس طرح بیان کرتے ہیں۔
”اوّل حمد خدا دا ورد کیجئے
عشق کیتی سو جگ دا مول میاں
پہلاں آپ ای رب نے عشق کیتا
معشوق ہے نبی رسول میاں“
وارث شاہؒ نے وہ ساری خوبیاں اور خصوصیات اپنی ہیر میں سمو دی ہیں جو کسی داستان کا حصہ ہوتی ہیں۔ ”ہیر رانجھا“ کا قصہ سب سے پہلے دمودر نے پیش کیا آج بھی یہ قصہ دوسری تمام عشقیہ داستانوں سے زیادہ پڑھا اور سُنا جاتا ہے۔ وارث شاہ ؒنے ”ہیر رانجھا“ کی داستان میں شروع سے لیکر آخر تک مکالمہ نگاری سے کام لیا ہے اور ان مکالموں کے ذریعے کہانی کے کرداروں کو بڑی رعنائی کے ساتھ بیان کیا ہے ہر کردار اپنے کام میں ڈوبا ہوا نظر آتا ہے۔
وارث شاہ ؒکا دور محمد شاہ رنگیلا سے لے کر احمد شاہ ابدالی تک کا دور ہے۔ وارث شاہ ؒنے اس سارے منظر کو شاعری کی شکل میں اس طرح بیان کیا ۔
”حق سچ دی گل نہ کرے کوئی
جھوٹ بولنا رسم سنسار ہوئی
مجلس لا کے کرنا حرام ایکا
صوبیدار تے حاکم نہ شاہ کوئی
رعیت ملک تے سب اجاڑ ہوئی
پیا ملک دے وچ ہے بڑا رولا
ہر کسے دے ہتھ تلوار ہوئی“
وارث شاہ کو پنجابی زبان کا شیکسپیئر بھی کہا جاتا ہے۔ پنجابی زبان کو آپ نے ہی عروج بخشا ہے۔ پنجابی کی تدوین و ترویج میں وارث شاہ نے نمایاں کردار ادا کیا ہے۔ آپکا کلام پاکستان اور ہندوستان بالخصوص سکھوں میں بہت مقبول ہے۔ ”ہیر“ میں بہت سی کہاوتوں کا بھی استعمال کیا گیا ہے جو لوگوں کیلئے ضرب المثل کا درجہ رکھتی ہیں مثال کے طور پر۔
وارث شاہ نہ عادتاں جاندیاں نیں
بھاویں کٹیئے پوریاں پوریاں اوئے“
”وارث رن، فقیر، تلوار، گھوڑا
چارے تھوک ایہہ کِسے دا یار نہیں“
”ڈنڈا پیر ہے وگڑیاں تگڑیاں دا
تے شیطان استاد داستیاں دا“
”وارث شاہ خلق تو لکالئیے
بھاویں اپنا ای گڑ کھالئیے“
وارث شاہ ؒکی ”ہیر“کے علاوہ دوسری تصانیف میں معراج نامہ، نصیحت نامہ، چوہریڑی نامہ اور دوہڑے شامل ہیں۔
وارث شاہؒ کا عرس مبارک ہر سال ساون کی 8، 9، 10 تاریخ کو جنڈیالہ شیر خان میں منایا جاتا ہے
عرس کے موقع پر ہیر پڑھنے کے مقابلے ہوتے ہیں۔ جن میں ہیر پڑھنے والے پاکستان کے علاوہ دوسرے ملکوں سے آ کر حصہ لیتے ہیں۔ 1983ءمیں سید وارث شاہ میموریل کمیٹی نے 80 لاکھ روپے کی لاگت سے مزار کی عمارت کو تعمیر کروایا۔ وارث شاہ کمپلیکس آٹھ ایکڑ پر مشتمل ہے۔
افضل حق نے اپنی کتاب معشوقہ پنجاب میں لکھا ہے کہ آپ نے 1233ھ میں وفات پائی۔
وارث میاں انت خاک ہونا
لکھ آب حیات جے پیو نائیں